ಕೊರೊನಾ ಮಹಾಮಾರಿ ಇಡೀ ವಿಶ್ವವನ್ನೇ ನಲುಗಿಸಿದೆ. ಎಲ್ಲಾ ಕ್ಷೇತ್ರಗಳ ಮೇಲೂ ಪರಿಣಾಮ ಬೀರಿರೋ ಈ ಕಣ್ಣಿಗೆ ಕಾಣದ ಜೀವಿಯಿಂದ ಕ್ರೀಡಾ ಕ್ಷೇತ್ರವೂ ಹೊರತಾಗಿಲ್ಲ. ಇದೀಗ ಎಲ್ಲರೂ ಬಹು ನಿರೀಕ್ಷೆಯಿಂದ ಕಾಯ್ತಾ ಇರೋ ಇಂಡೋ-ಆಸಿಸ್​​ ಹೈವೋಲ್ಟೆಜ್​ ಫೈಟ್​ ಮೇಲೂ ಕೊರೊನಾ ಕರಿಛಾಯೆ ಮೂಡಿದೆ.

ಅಡಿಲೇಡ್​​ನಲ್ಲಿ ಪಿಂಕ್​ ಬಾಲ್​ ಟೆಸ್ಟ್​ ಅನುಮಾನ
ಭಾರತ- ಆಸ್ಟ್ರೇಲಿಯಾ ಹೈವೋಲ್ಟೆಜ್​ ಟೆಸ್ಟ್​ ಸರಣಿಗಾಗಿ ಅಭಿಮಾನಿಗಳು ಕಾದು ಕುಳಿತಿದ್ದಾರೆ. ಅದರಲ್ಲೂ ಅಡಿಲೇಡ್​​ನಲ್ಲಿ ನಡೆಯಲಿರೋ ಮೊದಲ ಟೆಸ್ಟ್​​ ಪಂದ್ಯವಂತೂ ಉಭಯ ತಂಡಗಳಿಗೆ ಪ್ರತಿಷ್ಠೆಯ ಕಣ. ಇದು ಟೀಮ್​ ಇಂಡಿಯಾ ವಿದೇಶಿ ಪಿಚ್​​ನಲ್ಲಿ ಮೊದಲ ಬಾರಿ ಆಡ್ತಾ ಇರೋ ಡೇ ಆಯಂಡ್​ ನೈಟ್​ ಟೆಸ್ಟ್​. ಈಗಾಗಲೇ ಗೆಲುವಿಗೆ ಪಣ ತೊಟ್ಟಿರೋ ತಂಡಗಳು ಅಡಿಲೇಡ್​ ಪಿಚ್​ ಗಮನದಲ್ಲಿಟ್ಟುಕೊಂಡು ಗೇಮ್​ಪ್ಲಾನ್​, ಸ್ಟಾರ್ಟಜಿಗಳ ಬಗ್ಗೆ ಗಮನಹರಿಸಿವೆ. ಈಗ ನೋಡಿದ್ರೆ ಅಡಿಲೇಡ್​ನಲ್ಲಿ ಪಂದ್ಯ ನಡೆಯೋದೆ ಅನುಮಾನವಾಗಿದೆ.

ಹೌದು. ಕೊರೊನಾ ಮಹಾಮಾರಿ ಮೊದಲ ಟೆಸ್ಟ್​ ಪಂದ್ಯಕ್ಕೆ ಕಂಟಕವಾಗಿ ಪರಿಣಮಿಸಿದೆ. ಅಡಿಲೇಡ್​​ನಲ್ಲಿ ಆಯೋಜನೆಯಾಗಿರೂ ಈ ಪಂದ್ಯ ನಡೆಯೋದೇ ಅನುಮಾನವಾಗಿದೆ. ಕಳೆದ ಏಪ್ರಿಲ್​ನಿಂದ ಕೊರೊನಾ ಪ್ರಕರಣಗಳೇ ದಾಖಲಾಗದ ಇಲ್ಲಿ ಕಳೆದ 2 ದಿನಗಳಲ್ಲಿ 17 ಪಾಸಿಟಿವ್​ ಪ್ರಕರಣಗಳು ದೃಢಪಟ್ಟಿವೆ. ಇದೇ ಕಾರಣಕ್ಕೆಅಡಿಲೇಡ್​​ನಲ್ಲಿ ಪಂದ್ಯ ಆಯೋಜನೆಯೂ ಡೌಟ್​ ಆಗಿದೆ.

17 ಪ್ರಕರಣಗಳು ದಾಖಲಾದ ಬೆನ್ನಲ್ಲೆ ಎಚ್ಚೆತ್ತುಕೊಂಡಿರುವ ಸೌತ್​ ಆಸ್ಟ್ರೇಲಿಯಾ ಸರ್ಕಾರ ಗಡಿ ನಿರ್ಭಂದ ವಿಧಿಸಲು ಮುಂದಾಗಿದೆ. ​ಡಿಸೆಂಬರ್​​ 17ರಂದು ಪಂದ್ಯ ಆಯೋಜನೆಯಾಗಿದ್ರೂ, ಟೂರ್​ ಪ್ಲಾನ್​ ಪ್ರಕಾರ ಎರಡೂ ತಂಡಗಳು ಡಿಸೆಂಬರ್​ 10ಕ್ಕೆ ಅಡಿಲೇಡ್​ಗೆ​​ ತೆರಳಲಿವೆ. ಅದರೊಳಗೆ ಸೌತ್​ ಆಸ್ಟ್ರೇಲಿಯಾ ಗಡಿ ನಿರ್ಬಂಧವನ್ನ ಸಡಿಲಿಸದಿದ್ದರೆ ಅಡಿಲೇಡ್​ನಲ್ಲಿ ಟೆಸ್ಟ್​ ನಡಿಯಲ್ಲ.

ಹೋಮ್​ ಕ್ವಾಂರಟೀನ್​ನಲ್ಲಿ ಆಸಿಸ್ ಟೆಸ್ಟ್​ ಕ್ಯಾಪ್ಟನ್​
ಮೊದಲ ಟೆಸ್ಟ್​​ ಪಂದ್ಯಕ್ಕೆ ಅಡಿಲೇಡ್​ ಆತಿಥ್ಯ ವಹಿಸೋದು ಅನುಮಾನ ಅನ್ನೋದು ಒಂದೆಡೆಯಾದ್ರೆ, ತಂಡದ ಆಟಗಾರರೇ ಹೋಮ್​ ಕ್ವಾರಂಟೀನ್​ಗೆ ಒಳಗಾಗ್ತಾ ಇರೋದು ಕ್ರಿಕೆಟ್​​ ಆಸ್ಟ್ರೇಲಿಯಾಗೆ ತಲೆ ನೋವಾಗಿದೆ. ಕೆಲ ದಿನಗಳ ಹಿಂದೆ ಶೆಫೀಲ್ಡ್​​ ಶಿಲ್ಡ್​ ಟೂರ್ನಿಯಲ್ಲಿ ಪಾಲ್ಗೊಂಡಿದ್ದ ಆಟಗಾರರು ಕ್ವಾರಂಟೀನ್​ಗೆ ಒಳಪಡಬೇಕಿದೆ. ಈಗಾಗಲೇ ಟೆಸ್ಟ್​ ತಂಡದ ನಾಯಕ ಟಿಮ್​ ಫೈನ್​, ಕೀಪರ್​ ಮ್ಯಾಥ್ಯೂ ವೇಡ್​ ಹೋಮ್​ ಕ್ವಾರಂಟೀನ್​ನಲ್ಲಿದ್ದಾರೆ. ಇದೂ ಆಸಿಸ್​ ಪಾಳಯಕ್ಕೆ ತಲೆನೋವಾಗಿದೆ.

ಅಸ್ಟನ್​ ಅಗರ್​, ಕ್ಯಾಮರೂನ್​ ಗ್ರೀನ್​ಗೂ ಕ್ವಾರಂಟೀನ್​
ಸ್ಟಿನ್ನರ್​ ಅಸ್ಟನ್ ಅಗರ್​, ಆಲ್​ರೌಂಡರ್​ ಕ್ಯಾಮರೂನ್​ ಗ್ರೀನ್​ ಕೂಡ ಶೆಫೀಲ್ಡ್​​ ಶಿಲ್ಡ್​​ ಟೂರ್ನಿಯ ಭಾಗವಾಗಿದ್ರು. ಹೀಗಾಗಿ ಈ ಆಟಗಾರರೂ ಹೋಮ್​ ಐಸೋಲೆಷನ್​ಗೆ ಒಳಗಾಗಬೇಕಿದೆ. ಏಕದಿನ, ಟಿ-20 ಸರಣಿಯ ತಂಡದ ಭಾಗವಾಗಿರೂ ಇವರು 14 ದಿನಗಳ ಕ್ವಾರಂಟೀನ್​ಗೆ ಒಳಾಗಾದ್ರೆ, ಆರಂಭಿಕ ಪಂದ್ಯಗಳಿಂದ ಹೊರಗುಳಿಯಲಿದ್ದಾರೆ. ಇವರಿಷ್ಟೇ ಅಲ್ಲ.. ಸ್ಪಿನ್​ ಮಾಂತ್ರಿಕ ನಥಾನ್​ ಲಯನ್​ ಕೂಡ ಕೆಲ ದಿನಗಳ ಹಿಂದೆ ಸೌತ್​ ಆಸ್ಟ್ರೇಲಿಯಾಗೆ ಭೇಟಿ ನೀಡಿದ್ರು. ಅಂದು ಸ್ನೇಹಿತರ ಮನೆಗೆ ತೆರಳಿದ್ದ ಇವರು ಈಗ ಕ್ವಾರಂಟೀನ್​ಗೆ ಒಳಗಾಗಿದ್ದಾರೆ ಎಂಬ ಮಾಹಿತಿಯಿದೆ.

ಒಂದು ವೇಳೆ ಅಡಿಲೇಡ್​​ ಮೈದಾನ ಅಲಭ್ಯವಾದ್ರೆ ಅಥವಾ ಕ್ವಾರಂಟೀನ್​ನಲ್ಲಿರೊ ಆಟಗಾರರಲ್ಲಿ ಕೊರೊನಾ ಪಾಸಿಟಿವ್​ ದೃಢಪಟ್ಟರೆ ಆಸಿಸ್​ ಕ್ರಿಕೆಟ್​ ಮಂಡಳಿಯ ನಡೆ ಏನು ಅನ್ನೋದೇ ಸದ್ಯದ ಕುತೂಹಲ.