ಕೊಹ್ಲಿಯಂತಹ ಶ್ರೇಷ್ಠ ಆಟಗಾರನನ್ನು ನನ್ನ ಜೀವನದಲ್ಲಿಯೇ ನೋಡಿಲ್ಲವೆಂದ ಲ್ಯಾಂಗರ್!

ವಿರಾಟ್‌ ಕೊಹ್ಲಿಯಂತಹ ಅದ್ಭುತ ಆಟಗಾರನನ್ನು ನಾನೆಂದೂ ನೋಡಿಲ್ಲ ಎಂದು ಶ್ಲಾಘಿಸಿದ ಆಸ್ಟ್ರೇಲಿಯಾ ಮುಖ್ಯ ಕೋಚ್‌ ಜಸ್ಟಿನ್‌ ಲ್ಯಾಂಗರ್‌, ಭಾರತ ತಂಡದ ನಾಯಕನ ಅನುಪಸ್ಥಿತಿ ಖಂಡಿತಾ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯ ಮೇಲೆ ಗಂಭೀರ ಪರಿಣಾಮ ಬೀರಲಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.

ವಿರಾಟ್‌ ಕೊಹ್ಲಿ ಹಾಗೂ ಅವರ ಪತ್ನಿ ಅನುಷ್ಕಾ ಶರ್ಮಾ ಜನವರಿ ಆರಂಭದಲ್ಲಿ ಮೊದಲನೇ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಈ ಹಿನ್ನೆಲೆಯಲ್ಲಿ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯ ಮೂರು ಹಣಾಹಣಿಗಳಿಗೆ ಕೊಹ್ಲಿ ಗೈರಾಗಲಿದ್ದಾರೆ. ಹಾಗಾಗಿ, ವಿರಾಟ್‌ ಕೊಹ್ಲಿ ಸೀಮಿತ ಓವರ್‌ಗಳ ಸರಣಿಗಳನ್ನು ಹಾಗೂ ಟೆಸ್ಟ್‌ ಸರಣಿಯ ಒಂದು ಆಡಿದ ಬಳಿಕ ಭಾರತಕ್ಕೆ ವಾಪಸ್‌ ಆಗಲಿದ್ದಾರೆ. ನ.27 ರಿಂದ ಮೊದಲನೇ ಏಕದಿನ ಪಂದ್ಯದ ಮೂಲಕ ಭಾರತದ ಪ್ರವಾಸ ಆರಂಭವಾಗಲಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿದ ಆಸ್ಟ್ರೇಲಿಯಾ ಮುಖ್ಯ ಕೋಚ್,‌ ವಿರಾಟ್‌ ಕೊಹ್ಲಿ ವಿಶ್ವದ ಅತ್ಯಂತ ಶ್ರೇಷ್ಠ ಆಟಗಗಾರ. ಅವರ ಅನುಪಸ್ಥಿತಿ ಟೆಸ್ಟ್‌ ಸರಣಿಯ ಮೇಲೆ ಗಂಭೀರ ಪರಿಣಾಮ ಬೀರಲಿದೆ ಎಂದು ಹೇಳಿದ್ದಾರೆ.

“ವಿರಾಟ್‌ ಕೊಹ್ಲಿ ಅವರು ಶ್ರೇಷ್ಠ ಬ್ಯಾಟ್ಸ್‌ಮನ್‌, ನನ್ನ ಜೀವನದಲ್ಲಿಯೇ ಇಂತಹ ಆಟಾಗಾರನನ್ನು ನೋಡಿಯೇ ಇಲ್ಲ. ಈ ಹಿಂದೆಯೂ ಇದೇ ಮಾತನ್ನು ಹೇಳಿದ್ದೆ. ಕೊಹ್ಲಿಗೆ ಈ ಸ್ಥಾನ ನೀಡಲು ಸಾಕಷ್ಟು ಕಾರಣಗಳಿಗೆ,” ಎಂದು ಜಸ್ಟಿನ್‌ ಲ್ಯಾಂಗರ್‌ ವರದಿಗಾರರಿಗೆ ವಿಡಿಯೋ ಕರೆಯಲ್ಲಿ ಈ ರೀತಿ ಹೇಳಿದ್ದಾರೆ.

“ಅವರ ಬ್ಯಾಟಿಂಗ್‌ ಬಗ್ಗೆ ಮಾತ್ರ ಅಲ್ಲ, ಅವರ ಶಕ್ತಿ, ಆಟದ ಬಗ್ಗೆ ಅವರಿಗಿರುವ ಉತ್ಸಾಹ ಹಾಗೂ ಮೈದಾನದಲ್ಲಿ ಅವರಿಗೆ ಇರುವ ಸ್ನೇಹಿತರು ಇದೆಲ್ಲವೂ ಅವರನ್ನು ಶ್ರೇಷ್ಠತೆಯನ್ನು ಪ್ರತಿಬಿಂಬಿಸುತ್ತದೆ. ಕೊಹ್ಲಿ ಮಾಡುವ ಎಲ್ಲದರಲ್ಲೂ ಅವರು ಪ್ರದರ್ಶಿಸುವ ಶಕ್ತಿಯನ್ನು ನಾನು ನಂಬಲು ಸಾಧ್ಯವಿಲ್ಲ,” ಎಂದು ಹೇಳಿದರು.

“ಅವರು(ಕೊಹ್ಲಿ) ಆಡದಿರುವುದು ನಮಗೆ ಸಂತೋಷವಾಗಿದೆಯೇ? ಇದು ಡಸ್ಟಿನ್ ಮಾರ್ಟಿನ್ ಅವರನ್ನು ರಿಚ್ಮಂಡ್‌ನಿಂದ ಹೊರಗೆ ಕರೆದೊಯ್ಯುವಂತಿದೆ, ಅಲ್ಲವೇ? ” ಚಾಂಪಿಯನ್ ಆಸ್ಟ್ರೇಲಿಯನ್ ರೂಲ್ಸ್ ಫುಟ್ಬಾಲ್ ಆಟಗಾರನನ್ನು ಉಲ್ಲೇಖಿಸಿ ಜಸ್ಟಿನ್ ಲ್ಯಾಂಗರ್ ಕೊಹ್ಲಿ ಬಗ್ಗೆ ಹೇಳಿದರು.

“ವಿರಾಟ್‌ ಕೊಹ್ಲಿ ಅನುಪಸ್ಥಿತಿ ಟೆಸ್ಟ್ ಸರಣಿಯಲ್ಲಿ ಭಾರತ ತಂಡದ ಮೇಲೆ ಗಂಭೀರ ಪರಿಣಾಮ ಬೀರಲಿದೆ. ಕೊನೆಯ ಬಾರಿ ಅವರು ನಮ್ಮನ್ನು ಸೋಲಿಸಿದ್ದರು. ನಿಜಕ್ಕೂ ಭಾರತ ಅತ್ಯುತ್ತಮ ತಂಡವಾಗಿದೆ,” ಎಂದು ತಿಳಿಸಿದರು.

“ವಿರಾಟ್‌ ಕೊಹ್ಲಿ ಇರಲಿ ಅಥವಾ ಇಲ್ಲದೆ ಇರಲಿ. ಈ ಬಗ್ಗೆ ನಾವು ಒಂದು ಸೆಕೆಂಡ್‌ ಸಂತೃಪ್ತರಾಗಲು ಸಾಧ್ಯವಿಲ್ಲ. ಹಾಗಾಗಿ, ಬೇಸಿಗೆಯಲ್ಲಿ ನಾವು ಬಹಳ ಎಚ್ಚರಿಕೆಯಿಂದ ಆಡಬೇಕು. ಇದಕ್ಕಾಗಿ ನಾವು ಕಾಯುತ್ತಿದ್ದೇವೆ,” ಎಂದು ಜಸ್ಟಿನ್‌ ಲ್ಯಾಂಗರ್‌ ಮಾತು ಮುಗಿಸಿದರು.