ತಮ್ಮಲ್ಲಿದ್ದ ಅತ್ಯಂತ ಕೆಟ್ಟ ಚಟವನ್ನು ಬಾಯ್ಬಿಟ್ಟ ವಿರಾಟ್‌ ಕೊಹ್ಲಿ..!

ಬೆಂಗಳೂರು: ಟೀಮ್‌ ಇಂಡಿಯಾ ನಾಯಕ ವಿರಾಟ್‌ ಕೊಹ್ಲಿ ಸದ್ಯ ವಿಶ್ವ ಕ್ರಿಕೆಟ್‌ನಲ್ಲಿ ಇರುವ ಅತ್ಯಂತ ಫಿಟ್‌ ಆಟಗಾರರಲ್ಲಿ ಒಬ್ಬರು. ಇನ್ನು ಭಾರತ ತಂಡದಲ್ಲಿ ಫಿಟ್ನೆಸ್‌ ವಿಚಾರದಲ್ಲಿ ನವ್ಯ ಭಾಷ್ಯವನ್ನೇ ಬರೆದ ಕೀರ್ತಿ ಕೊಹ್ಲಿಗೆ ಸಲ್ಲುತ್ತದೆ. ಅಂದಹಾಗೆ ಒಂದು ಕಾಲದಲ್ಲಿ ಕೊಹ್ಲಿ ಕೂಡ ಫಿಟ್ನೆಸ್‌ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಂಡಿದ್ದವರಲ್ಲ ಎಂದರೆ ಅಚ್ಚರಿಯಾಗಬಹುದು.

2012ರಲ್ಲಿ ತಮಗೆ ಫಿಟ್ನೆಸ್‌ ಬಗ್ಗೆ ಜ್ಞಾನೋದಯವಾಗಿದ್ದಾಗಿ ಕೊಹ್ಲಿ ಈ ಹಿಂದೆ ಹಲವು ಬಾರಿ ಹೇಳಿಕೊಂಡಿದ್ದಾರೆ. ಅಂದು ಕನ್ನಡಿ ಎದುರು ನಿಂತು ಈ ರೀತಿ ಇದ್ದರೆ ಭಾರತ ತಂಡದಲ್ಲಿ ಹೆಚ್ಚು ಸಮಯ ಆಡಲು ಖಂಡಿತಾ ಸಾಧ್ಯವಿಲ್ಲ ಎಂದು ನಿರ್ಧರಿಸಿದ ಕೊಹ್ಲಿ, ನಿತ್ಯ ವ್ಯಾಯಾಮ ಮತ್ತು ಕಟ್ಟು ನಿಟ್ಟಿನ ಆಹಾರ ಕ್ರಮ ಅನುಸರಿಸುವ ಮೂಲಕ ನೋಡುಗರು ಬೆರಗಾಗುವ ರೀತಿಯಲ್ಲಿ ಮೈಯನ್ನು ಉಕ್ಕಿನಂತೆ ಗಟ್ಟಿ ಮಾಡಿಕೊಂಡಿದ್ದರು.

“2012ರ ಐಪಿಎಲ್‌ ಬಳಿಕ ನಾನು ಮನೆಗೆ ಬಂದಿದ್ದೆ. ನನ್ನನ್ನು ನೋಡಿದರೆ ನನಗೇ ಅಸಹ್ಯ ಹುಟ್ಟುತ್ತಿತ್ತು. ನನ್ನ ದೈಹಿಕ ಸ್ಥಿತಿ ಬದಲಾಯಿಸಲು ನಿರ್ಧರಿಸಿದೆ. ಜೊತೆಗೆ ಕ್ರಿಕೆಟ್‌ ಜಗತ್ತಿನಲ್ಲಿ ಆಗುತ್ತಿರುವ ಬದಲಾವಣೆಗಳ ಕಡೆಗೂ ಗಮನ ನೀಡಿದೆ. ಫಿಟ್ನೆಸ್‌ ವಿಚಾರದಲ್ಲಿ ನಮ್ಮ ತಂಡ ಬಹಳ ಹಿಂದೆ ಬಿದ್ದಿದೆ ಎಂಬುದರ ಅರಿವಾಯಿತು. ಉಳಿದ ತಂಡಗಳು ನಮಗಿಂತಲೂ ಹೆಚ್ಚು ಫಿಟ್‌ ಆಟಗಾರರನ್ನು ಹೊಂದಿದ್ದವು,” ಎಂದು ಭಾರತ ಟೆಸ್ಟ್‌ ತಂಡದ ಆರಂಭಿಕ ಬ್ಯಾಟ್ಸ್‌ಮನ್‌ ಮಯಾಂಕ್‌ ಅಗರ್ವಾಲ್‌ ನಡೆಸಿಕೊಟ್ಟ ಬಿಸಿಸಿಐ ಟಿವಿ ಕಾರ್ಯಕ್ರಮದಲ್ಲಿ ಕೊಹ್ಲಿ ಹೇಳಿದ್ದಾರೆ.

“ಆ ಸಂಗತಿ ನನ್ನನ್ನು ಬಹಳ ಕಾಡಿತ್ತು. ಮೊದಲು ವೈಯಕ್ತಿಕವಾಗಿ ಇದನ್ನು ಮುಂದೆ ಕೊಂಡೊಯ್ಯಬೇಕು ಎಂದು ಆರಂಭಿಸಿದೆ. 2012ರ ಬಳಿಕ ಈ ಜ್ಞಾನೋದಯವಾಯಿತು. ಅಲ್ಲಿಯವರೆಗೆ ನನ್ನ ಮುಂದೆ ಏನೇ ಇಟ್ಟರೂ ಅದನ್ನು ತಿಂದುಬಿಡುತ್ತಿದ್ದೆ. ಬೆಂಗಳೂರಿನ ಐಟಿಸಿ ಗಾರ್ಡೇನಿಯಾ ಹೋಟೆಲ್‌ನಲ್ಲಿ ಉಳಿದುಕೊಳ್ಳುತ್ತಿದ್ದೆ. ಅಲ್ಲಿ ರೂಮ್‌ನ ಮಿನಿ ಬಾರ್‌ನಲ್ಲಿ ಎಕ್ಲೇರ್ಸ್‌ ಚಾಕೋಲೆಟ್ ಪ್ಯಾಕ್‌ ಇಡುತ್ತಿದ್ದರು. 4-5 ದಿನಗಳಲ್ಲಿ ಆ ಸಂಪೂರ್ಣ ಪ್ಯಾಕ್‌ ಖಾಲಿ ಮಾಡಿಬಿಡುತ್ತಿದ್ದೆ. ತಿನ್ನೋ ವಿಚಾರದಲ್ಲಿ ನನ್ನ ಅತ್ಯಂತ ಕೆಟ್ಟ ಚಟ ಅದಾಗಿತ್ತು. ಒಂದು ಪ್ಯಾಕ್‌ನಲ್ಲಿ 40 ಟಾಫಿಗಳು ಇರುತ್ತಿದ್ದವು,” ಎಂದು ಕೊಹ್ಲಿ ಅಚ್ಚರಿಯ ಸಂಗತಿಯೊಂದನ್ನು ‘ಓಪನ್‌ ನೆಟ್ಸ್‌ ವಿತ್‌ ಮಯಾಂಕ್‌’ ಚಾಟ್‌ ಕಾರ್ಯಕ್ರಮದಲ್ಲಿ ಬಹಿರಂಗ ಪಡಿಸಿದ್ದಾರೆ.

ಇನ್ನು 2012ರ ಐಪಿಎಲ್‌ನಲ್ಲಿ ಕೊಹ್ಲಿ ಹೇಳಿಕೊಳ್ಳುವ ಪ್ರದರ್ಶನವನ್ನೇನೂ ನೀಡಿರಲಿಲ್ಲ. ಆಡಿದ 16 ಪಂದ್ಯಗಳಿಂದ 28ರ ಸರಾಸರಿಯಲ್ಲಿ ಕೇವಲ 354 ರನ್‌ಗಳನ್ನು ಮಾತ್ರ ಗಳಿಸಿದ್ದರು. ಆದರೆ, ಇದಕ್ಕೂ ಮುನ್ನ 2011ರ ಐಪಿಎಲ್‌ನಲ್ಲಿ 4 ಅರ್ಧಶತಗಳೊಂದಿಗೆ 557 ರನ್‌ಗಳನ್ನು ಗಳಿಸಿದ್ದರು. ಆ ಸಮಯದಲ್ಲಿ ತಾವು ಜಂಕ್‌ ಫುಡ್‌ಗಳನ್ನು ಸಿಕ್ಕಾಪಟ್ಟೆ ತಿನ್ನುತ್ತಿದುದ್ದಾಗಿ ಕೊಹ್ಲಿ ಇದೇ ವೇಳೆ ತಿಳಿಸಿದ್ದಾರೆ.

“ನನ್ನ ಆಹಾರ ಕ್ರಮ ಆಗ ಅಷ್ಟು ಕೆಟ್ಟದಾಗಿತ್ತು. ಆ ಸಮಯದಲ್ಲಿ ಯಶಸ್ಸಿನ ಹಾದಿಯಲ್ಲಿದ್ದೆ. ಎಲ್ಲವು ಸರಿಯಾದ ದಾರಿಯಲ್ಲೇ ಸಾಗುತ್ತಿತ್ತು. ಹಾಗೆಯೇ ತಿನ್ನೋ ವಿಚಾರದಲ್ಲೂ ಕೂಡ ಹುಚ್ಚನಂತೆ ಎಲ್ಲವನ್ನೂ ತಿಂದು ತೇಗುತ್ತಿದ್ದೆ. ಅಂತೆಯೇ 2012ರ ಐಪಿಎಲ್‌ನಲ್ಲಿ ಆರ್‌ಸಿಬಿ ಪರ ಅಬ್ಬರಿಸುತ್ತೇನೆ ಎಂದು ಮುಂದಾದೆ. ಅಂದುಕೊಂಡಂತೆ ಯಾವುದೂ ನಡೆಯಲಿಲ್ಲ. ಬಳಿಕ ಎಲ್ಲವನ್ನೂ ಬದಲಾಯಿಸುವ ದಿಟ್ಟ ನಿರ್ಧಾರ ಮಾಡಿದೆ. ವರ್ಕ್‌ಔಟ್‌ ಮತ್ತು ಡಯೆಟ್‌ ಎಲ್ಲವನ್ನೂ ಮರುದಿನವೇ ಆರಂಭಿಸಿದೆ ಅದ್ಭುತ ಫಲಿತಾಂಶವೇ ಲಭ್ಯವಾಯಿತು,” ಎಂದು ಕೊಹ್ಲಿ ವಿವರಿಸಿದ್ದಾರೆ.

 

-vk